قصيدة "ماشي يا مغاوري": زجل شعبي ساخر بقلم الشاعر الغنائي محمد ممدوح

قصيدة "ماشي يا مغاوري".. زجل شعبي من روح ميت أبو الكوم

تأليف: محمد ممدوح (شاعر غنائي من أبناء ميت أبو الكوم)

هذه القصيدة هي لون من ألوان الزجل الشعبي الساخر المنتشر في ميت أبو الكوم، ألفها الشاعر كنوع من الاعتراض الفكاهي والكوميدي على أسلوب أحد الأشخاص في بيع منتجاته.

ماشــي يا مـغــاوري

جايب كل حاجة وعامل فيها دولي
ماشى يا مغاوري
وان ما لقتش حاجة تبقى عنده فوري
ماشى يا مغاوري
دنتـا ناقص تخش الدوري
ماشى يا مغاوري
اوعى يا بت تعدي عليه مرة وتشاوري
إلا وتقوليله ماشي يا مغاوري
ماشى يا مغاوري

وفي رمضان يجيب كنافة بالزبيب ويعمل تمر هندي
تسأل على أي حاجة يقولك طبعاً عندي
عنده كل حاجة من الإبرة للصاروخ
ومتتحججشي أبداً إنك تروح طوخ
جايب سُبح وطواقي وحاجة الشيوخ
ناقص كمان تجيب جمبري وبطروخ
وتجيب فاكهة كتيرة تفاح وموز وخوخ
اوعى يا مغاوري تجيب بانجو وحشيش وتخلي الشباب يدوخ!

يا هاني يا مغاوري يا بن الإيه
علشان تديني إزازة بيبسي من أم جنيه
عاوز واسطة أو كارنيه؟!
حقها بكرة راح أعديه.. لو حتى أخوك أنا هاديه
دي إزازة بيبسي مش ضاني وبانيه
طلبت بيبسي ويا الشيبسي
ومين يديني دانت مغاوري

يا هاني يا خالد دا أنا خليتكم سنتر دولي
قلت عليكم أهلي وانبي
وبهتافاتي دخلتوا الدوري
عاوز إيه تاني يا مغاوري؟

قلبي يا هاني وجعني
لما تقولي أنا ما بابيعشي
كل بضاعتك فاسدة وبايظة وأجي أرجع ما ترجعشي
تأمين وضرائب يا بني وما بتدفعشي
حتى الطرشي بقاله سنين فى البرطمانات
ولا حطيت له شوية ملح ولا جيت جنبه بالبهارات
آكل أى حاجة من عندك وأجري بسرعة على العيادات
اللي مسورق وفي غيبوبة
واللي أهو طب فجأة ومات!
عايز إيه تاني يا مغاوري؟
ماشى يا مغاوري

يا مغاوري شد حيلك
دا أمك والله بتدعيلك
والله لأجي وأغنيلك
وإن روحت الشهداء
راح أجيلك نرقص كمان ونشيلك
شد حيلك وارفع راسنا
واوعى يا واد تجرسنا
وتفضحنا وتجرح أحاسيسنا
دا إحنا المعازيم وأنت عريسنا
شد حيلك وارفع راسنا

---

شعر: محمد ممدوح - ميت أبو الكوم